Ndërsa te Burnley mund të ketë një ndjesi frustrimi për barazimin e fundit që e mban trajnerin Scott Parker ende në “aparate” pas një serie prej shtatë humbjesh radhazi, Armando Broja ka arsye të forta për të buzëqeshur. Sulmuesi shqiptar ka thyer më në fund mallkimin, duke shënuar golin e tij të parë në Premier League pas plot 810 ditësh.
Për ta kuptuar se sa kohë ka kaluar nga goli i tij i fundit në këtë kampionat, mjafton të kujtojmë se në atë ndeshje kishte shënuar edhe Mykhaylo Mudryk, ndërsa në stolin e Chelsea-t ulej Mauricio Pochettino, i cili e zëvendësoi Brojën pas një ore lojë për shkak të dëmtimit të tij të radhës. Që prej asaj kohe, huazimet te Fulham dhe Everton vetëm sa e shtuan frustrimin e sulmuesit, i cili u përball me dëmtime të shumta dhe mungesë minutash.
Pavarësisht vështirësive të tij të dokumentuara mirë, Burnley tregoi një besim të jashtëzakonshëm duke investuar 20 milionë paund për kartonin e tij dhe duke i ofruar një kontratë 5-vjeçare. Ky bast i guximshëm i klubit filloi të shpërblehet pjesërisht në ndeshjen kundër Bournemouth, ku Broja gjeti rrugën e rrjetës, duke treguar se nuhatja e tij për golin është ende aty.
Në një javë ku emra si Cristian Romero (Tottenham) cilësohen si “humbës” për shkak të sjelljeve të tyre në fushë, Broja renditet përkrah yjeve si Morgan Rogers (Aston Villa) si një nga pikat më të ndritshme të fundjavës. Ky gol nuk është thjesht një statistikë, por një çlirim emocional për sulmuesin që pritet të udhëheqë sulmin e Burnley-t në betejën e vështirë për mbijetesë.
