Një nga surprizat e këtij edicioni të pestë të Big Brother Vip Albania, padyshim që ishte edhe Monika Kryemadhi! Politikania e cila ka vendosur që të lërë paksa anash “dashurinë e saj të parë”, politikën, mbrëmjen e së shtunës u fut në të tjera “ujëra”, në një reality show.
Në karrigen e opinionistes, krah Arbër Hajdarit, “Mona” shkëlqeu me opinionet e saj të drejtpërdrejta, të mprehta dhe ashtu si ajo di t’i thotë, pa doreza.
Shumë e pëlqyen dhe e komentuan, ndërkohë që disa të tjerë i kërkuan që nëse arrin të fitojë zemrat e shqiptarëve përmes këtij formati, atëhere zgjedhjet e ardhshme duhet që të kandidojë për postin e Kryeministres.
E kjo ide mesa duket i ka pëlqyer edhe vetë Kryemadhit, e cila ndonëse ka deklaruar se është shkëputur nga politika, “zemra” vazhdon që t’i rrahë për të.
“Kurrë mos thuaj kurrë”, ja ka kthyer ajo, duke lënë kështu të kuptohet qartësisht që synimi i saj në të ardhmen është zyra e kryeministrit Edi Rama.
