Në Shqipëri, numri i shqiptarëve që jetojnë jashtë vendit është pothuajse i barabartë me ata që jetojnë brenda territorit kombëtar. Sipas të dhënave të Institutit të Statistikave, deri në vitin 2025, pritet që diaspora e re e shqiptarëve të arrijë në rreth 2.256.346 individë, që përbën rreth 49% të popullsisë totale të vendit. Në përputhje me censin e fundit, numri i popullsisë në Shqipëri është 2.402.113.
Kjo diasporë është kryesisht e re, me një përqindje të madhe nga grupmosha 15-64 vjeç, duke përbërë shumicën. Fëmijët deri në 14 vjeç përfaqësojnë 18% të kësaj popullate, ndërsa individët mbi 65 vjeç përbëjnë rreth 5%. Shifra tregon që janë 1.177.529 meshkuj dhe 1.078.817 femra, duke reflektuar një diasporë të re, ekonomikisht aktive, me potencial të lartë për kontribut në tregjet e punës në vendet pritëse.
Ndryshe nga emigrantët e mëparshëm që migruan kryesisht drejt SHBA-së, diaspora e re favorizon më shumë vende europiane, me Greqinë si qëndrën kryesore. Vend tjetër është Italia, e ndjekur nga Gjermania, Franca dhe Mbretëria e Bashkuar. Sipas Eurostat, gjatë vitit 2024, Italia, Greqia dhe Gjermania do të kenë përqendrim më të madh të shqiptarëve me leje qëndrimi, ku 47,6% e lejeve janë për arsye të bashkimit familjar, e ndjekur nga arsyeja e punësimit me 29,1%.
Motivat për largimin kryesisht lidhen me kërkimin e mundësive më të mira ekonomike, me 16% të emigrantëve që përmendin arsyet familjare dhe 6% arsyet që lidhen me arsimin. Këto shifra pasqyrojnë një trend të vazhdueshëm të emigracionit, ku shqiptarët shpresojnë për kushte më të mira jetese dhe mundësi për të arritur aspiratat e tyre jashtë vendit. Të dhënat sugjerojnë se ky fenomen do të ketë ndikim të rëndësishëm në strukturën demografike dhe ekonomike të Shqipërisë në vitet e ardhshme.
