Dinastia futbollistike Ibrahimovic vazhdon të jetojë. Sot është bërë zyrtare se Vincent Ibrahimovic, djali 17-vjeçar i legjendës Zlatan Ibrahimovic, ka firmosur kontratën e tij të parë profesionale me gjigantët italianë të AC Milanit.
Vincent, mesfushor mbrojtës me pasaportë suedeze, hedh kështu hapin e parë të madh në karrierën e tij, duke ndjekur gjurmët e babait të famshëm. Milani tashmë ka edhe një tjetër Ibrahimovic në radhët e veta: Maximilian Ibrahimovic, vëllai i madh i Vincentit, i cili aktivizohet me skuadrën Milan U-19.
“AC Milan ka kënaqësinë të njoftojë se Vincent Zlatan Seger Ibrahimovic ka firmosur kontratën e tij të parë profesionale. Ai do të jetë pjesë e projektit ‘Milan Futuro’, një iniciativë e dedikuar për formimin dhe zhvillimin e talenteve të rinj,” thuhet në njoftimin zyrtar të klubit.
Babai i dy talenteve suedeze, Zlatan Ibrahimovic, ka një histori të artë me fanellën kuqezi. Ai luajti për Milanin nga viti 2010 deri në 2012, duke regjistruar 163 paraqitje, 93 gola dhe 35 asistime, përpara se ta mbyllte karrierën pikërisht me Rossonerët në korrik 2023.
Tashmë, emri Ibrahimovic rikthehet sërish në “San Siro”, këtë herë përmes brezit të ri – dhe Zlatan ka vërtet çdo arsye të jetë krenar.
