Ndeshja Finalissima mes Spanjës dhe Argjentinës, kampionëve të Europës dhe botës, do të zyrtarizohet përfundimisht në orët e ardhshme. Takimi pritet të zhvillohet më 27 mars në Doha, Katar, ndërsa Spanja do të luajë edhe një miqësore tjetër kundër Egjiptit.
Sipas gazetarit të njohur argjentinas Gastón Edul, Argjentina ka dhënë miratimin përfundimtar për zhvillimin e Finalissimës, duke i hapur rrugë njoftimit zyrtar nga AFA, ashtu siç pritej edhe nga RFEF. Edhe gazeta AS e ka konfirmuar lajmin.
Përballja mes kampionëve të Amerikës së Jugut dhe atyre të Europës do të mbahet më 27 mars në Doha, me dakordësinë e të gjitha palëve të përfshira: RFEF, UEFA dhe CONMEBOL. Pengesa e vetme deri tani kishte qenë AFA, e cila e kishte vonuar njoftimin për shkak të problemeve të brendshme, përfshirë një hetim gjyqësor dhe raportime për përçarje mes stafit teknik dhe drejtuesve.
Katarit, që feston Ditën Kombëtare më 18 dhjetor, i intereson ta shfrytëzojë këtë periudhë për ta shpallur me bujë ndeshjen mes Argjentinës dhe Spanjës, e cila do të luhet në stadiumin Lusail, impianti që priti edhe finalen e Kupës së Botës.
Përveç Finalissimës, gjatë së njëjtës pauzë ndërkombëtare do të zhvillohen edhe dy miqësore të tjera në Doha: Argjentina do të përballet me Katarin, ndërsa Spanja do të luajë kundër Egjiptit. Edhe këto takime pritet të konfirmohen zyrtarisht së bashku me shpalljen e Finalissimës.
