Erik Lloshi tregoi në programin e Ermal Peçit “Më prit të dielën” pritshmëritë e tij për pjesëmarrjen në Festivalin e Këngës. Lloshi çmoi bashkëpunimin për këtë këngë me mjeshtrin Flamur Shehu, teksa nuk mohoi se, sipas bindjes së tij, kënga mund të jetë fituesja e edicionit.
Gjatë rubrikave të programit, Eriku foli edhe për lajmet që e kanë shoqëruar kohët e fundit, sidomos pas ndarjes nga jeta të Shpat Kasapit. Në lidhje me diskutimet e Adelina Tahirit, e cila u shpreh se Adelina Ismajli duhej të kishte anuluar koncertin e saj ose të mbante minuta heshtje, ai u përgjigj:
“Është absurde kjo gjë. Ne jemi artistë, e kemi punë, i detyrohemi publikut. Edhe unë, gjatë ditëve kur Shpati ende s’kishte mbërritur në Maqedoni, mbajta koncertet e planifikuara. Ka artistë që kanë humbur njerëz edhe më të afërt, të familjes, jo shokë, dhe prapë kanë dalë në skenë.”
A u nxitua ai teksa foli për gjendjen shëndetësore të djalit të Shpatit?
“Mua Shpati më ka thënë që djali është mirë; nuk them unë nëse është apo jo në spektrin autik. Mos u fusni të gjykoni njerëzit pa ditur gjërat. Unë kam bërë pafund koncerte për këta fëmijë, i dua shumë.”
