Policia e Tiranës ka vënë në pranga një 21-vjeçar, i identifikuar me inicialet S. K., i dënuar më parë për vjedhje, i cili dyshohet se ka kryer disa vjedhje dhe ka nxitur një të mitur 13 vjeç të bashkëpunonte në këto veprime kriminale.
Sipas njoftimit zyrtar, hetimet e Komisariatit të Policisë Nr. 4 çuan në zbulimin e autorit të vjedhjes së ndodhur më 20.11.2025, ku S. K. dyshohet të ketë thyer një market dhe të ketë marrë produkte të ndryshme.
Gjithashtu, gjatë hetimeve u provua se ai kishte bashkëpunuar me një të mitur në dy vjedhje të kryera më 06.12.2025:
vjedhja e një shume parash dhe produkteve në një market;
vjedhja e një shume parash në një lokal.
Hetimet zbuluan edhe një veprimtari tjetër të paligjshme të 21-vjeçarit, i cili i kishte shitur një shtetasi veshje policie, një radio, pranga dhe municion luftarak. Policia vijon punën për të përcaktuar burimin e këtyre sendeve të kundërligjshme.
Gjatë operacionit u sekuestruan sendet e paligjshme, si dhe një shumë parash e dyshuar të jetë përfituar nga vjedhjet. Materialet procedurale i janë referuar Prokurorisë së Tiranës për veprime të mëtejshme.
