Arsenali ka pësuar një humbje të rëndësishme në Premier League, duke u mposhtur 2–1 nga Aston Villa në “Villa Park”, vetëm pak ditë pasi skuadra e Artetës kishte regjistruar rezultate të shkëlqyera si në Champions League ashtu edhe në kampionat.
Ndeshja nisi me dominim të vendasve, të cilët gjetën avantazhin në minutën e 36-të me anë të Matty Cash. Arsenali reagoi në pjesën e dytë dhe barazoi shpejt në minutën e 52-të falë Leandro Trossard, i cili shfrytëzoi një aksion të mirë të skuadrës londineze.
Megjithatë, kur dukej se ndeshja po shkonte drejt barazimit, Aston Villa goditi në minutën 90+5, me Emiliano Buendía që shënoi golin vendimtar pas një aksioni të rrëmujshëm në zonë, duke çuar stadiumin në festë.
Humbja vjen në një moment kur Arsenali kishte hyrë në një formë pozitive, me 10 fitore në 15 ndeshje të Premier League-s dhe performanca bindëse në Champions League. Pavarësisht rezultatit, “Topçinjtë” mbeten në krye të tabelës me 33 pikë, por tashmë Aston Villa u afrua gjithashtu, duke shkuar në kuotën e 30 pikëve.
Arteta do të kërkojë të rikthejë skuadrën te rezultatet pozitive, pasi gara për kreun e Premier League mbetet më e fortë se kurrë këtë sezon.
