Dani Carvajal po punon intensivisht për të shpejtuar rikthimin e tij në fushë. Edhe pse rikuperimi i plotë parashikohej të zgjaste nga gjashtë deri në dhjetë javë, mbrojtësi i Real Madridit mund të rikthehet para fundit të vitit, ndonëse mundësia më e madhe mbetet janari.
Situata është e ndërlikuar për Xabi Alonson, sidomos pas dëmtimit të Trent Alexander-Arnold. Trajneri mund t’i drejtohet sërish Valverdes për krahun e djathtë, ose të përdorë Asension, i cili ka luajtur më parë në atë pozicion pasi anglezi u dëmtua në San Mamés.
Carvajal iu nënshtrua artroskopisë më 27 tetor, një ditë pas El Clásico-s, për të hequr një “trup të lirë” nga gjuri i djathtë. Ai kishte raportuar shqetësime të forta të pazakonshme dhe analizat treguan se operacioni ishte i domosdoshëm. Rikthimi i tij i mundshëm para fundit të vitit lidhet me ndeshjen kundër Sevillas më 20 dhjetor, por duket më realist që të jetë gati për sfidën e parë të 2026-ës kundër Betis më 4 janar, si dhe për Superkupën në Jeddah kundër Atleticos më 8 janar.
Ajo që shqetëson më shumë është fakti se ndërhyrja u krye në të njëjtin gju ku Carvajal pësoi këputjen e ligamentit kryqëzor të përparmë në tetor të vitit 2024.
