Autoritetet e Koresë së Jugut kanë njoftuar zhvillimin e një aplikacioni për celularë, që do t’u mundësojë viktimave të ngacmimeve të ndjekin në kohë reale vendndodhjen e ngacmuesve të tyre, sidomos nëse ata janë afër. Ky aplikacion është pjesë e ndryshimeve të fundit në Aktin e Mbikëqyrjes Elektronike dhe ka për qëllim të rrisë sigurinë e viktimave të ndjekjeve, një problem që ka marrë një vëmendje në rritje në vend gjatë viteve të fundit.
Ministria e Drejtësisë e Koresë së Jugut ka theksuar se aktualisht ligji lejon viktimat të marrin njoftime me SMS kur ndjekësit e tyre janë në afërsi, por nuk ofron informacion të saktë mbi vendndodhjen e tyre. Me ligjin e ri, viktimat do të kenë mundësinë të shikojnë direkt në një hartë në telefonat e tyre celular vendndodhjen e ndjekësve, duke e lejuar kështu që ato të lëvizin në vende më të sigurta.
Gjithashtu, autoritetet plani për të integruar këtë sistem në linjën kombëtare të emergjencës deri në vitin 2026, në mënyrë që policia të mund të ndërhyjë menjëherë për të mbrojtur viktimat. Ky hap i ri vjen pas miratimit të një ligji në vitin 2021 që parashikon dënime deri në tre vjet burg për shkelësit e ligjit të ndjekjes, si dhe një gjobë maksimale prej 30 milionë won (rreth 17,400 euro). Në vitin 2023, parlamenti rishikoi këtë ligj për të lehtësuar procesin e ndjekjes penale të ngacmuesve.
Numri i ankesave për ndjekje ka treguar një rritje të dukshme, duke kaluar nga 7,600 ankesa në 2022 në më shumë se 13,000 ankesa vitin e kaluar. Kjo tregon për një vetëdijësim të rritur për problemin e ndjekjeve dhe një gatishmëri më të madhe nga ana e viktimave për të raportuar këto raste. Aplikacioni pritet të ketë një ndikim pozitiv në këtë drejtim, duke ofruar një mjet të ri për mbrojtjen e viktimave të ngacmimeve.
