Një ish-futbollist i kombëtares së Anglisë është vendosur nën masa ligjore pasi u arrestua në Aeroportin e Stansted, nën dyshimin për tentativë përdhunimi ndaj një ish-partnereje. Lojtari, i cili ka përfaqësuar “Tre Luanët” gjatë viteve 2010, u ndalua në pikën e kontrollit të pasaportave pasi sistemet e sigurisë sinjalizuan një kërkim të lëshuar më herët nga policia.
Arrestimi ndodhi në momentin kur ai po përgatitej të udhëtonte me një linjë ajrore me kosto të ulët. Pasi u ndalua nga Border Force, oficerët e Policisë së Essex-it e morën në pranga. Akuzat lidhen me pretendimet e ish-partneres së tij, e cila ka raportuar një incident të ndodhur gjatë marrëdhënies së tyre. Ajo po merr mbështetjen përkatëse dhe po intervistohet nga specialistë të fushës.
Për shkak të kufizimeve ligjore, identiteti i futbollistit nuk mund të bëhet publik. Pas arrestimit, ai u shoqërua në komisariat ku iu kryen procedurat standarde të hetimit. Ai u lirua më pas me kushte, të cilat duhet t’i respektojë deri në fund të shkurtit 2026, teksa hetimet vijojnë.
Rasti ka tërhequr vëmendjen e mediave dhe publikut, sidomos pasi lojtari ishte shfaqur në aktivitete publike kohët e fundit, ndonëse ishte në kërkim nga autoritetet. Policia e Essex-it ka konfirmuar arrestimin dhe ka deklaruar se hetimet po vazhdojnë.
