Mesfushori ofensiv i Kombëtares, Ernest Muçi, ka realizuar një supergol për Trabzonsporin në përballjen ndaj Konyasporit, e vlefshme për javën e 14-të të kampionatit turk. 24-vjeçari shënoi nga një goditje dënimi në një kënd të vështirë, duke çuar topin drejt e në trekëndësh me një harkim të përsosur, të paarritshëm për portierin.
Goli i tij erdhi në minutën e 56-të dhe vulosi rezultatin përfundimtar 3-1, pasi Muçi realizoi golin e tretë të sfidës. Me këtë fitore, Trabzonspori ngjitet në vendin e tretë me 31 pikë, po aq sa Fenerbahçe e vendit të dytë dhe vetëm një pikë larg kryesuesve të Galatasarayt.
Sipas aplikacionit të statistikave Sofascore, Muçi u vlerësua si lojtari i dytë më i mirë i ndeshjes me notën 7.8, duke dëshmuar formën fantastike që po kalon. Vetëm pesë ditë më parë, ai realizoi një dopietë dhe i dha fitoren ekipit të tij në minutën e fundit të ndeshjes dramatike ndaj Basaksehirit, që u mbyll 3-4.
Me këtë tjetër gol spektakolar, mesfushori shqiptar po konfirmon sërish se është një nga lojtarët më në formë të Superligës turke.
