Reperi i njohur me origjinë nga Kosova, Azet, ka reaguar pas raportimeve të mediave gjermane që njoftuan për një shpërthim të ndodhur mbrëmjen e së mërkurës në hyrje të një pallati apartamentesh në Düsseldorf, godinë që figuron në pronësinë e tij.
Lajmi shkaktoi shqetësim të menjëhershëm tek fansat dhe opinioni publik, pasi ngjarja u cilësua si e dyshimtë. Për t’i dhënë fund spekulimeve, Azet publikoi një deklaratë të qartë në Instagram.
Ai sqaroi se nuk ka qenë shënjestër e ndonjë atentati dhe se incidenti nuk ka asnjë lidhje me të personalisht.
“Nuk ka pasur asnjë atentat ndaj meje. Unë kam disa prona, përkatësisht banesa kolektive. I prekur ka qenë një nga këto objekte – unë vetë nuk banoj aty. Ngjarja nuk ka lidhje me mua,” deklaroi reperi.
Azet theksoi gjithashtu se apartamenti ku ndodhi shpërthimi është vetëm një nga pronat që ai zotëron dhe nuk përfaqëson vendin e tij të banimit.
Ndërkohë, autoritetet gjermane kanë nisur hetimet për zbardhjen e rrethanave të ngjarjes. Deri tani nuk raportohet për persona të lënduar.
