Ish-kampioni i Botës dhe legjenda e futbollit gjerman, Lothar Matthaus, ka shprehur besimin e tij se Lennart Karl ka potencialin për të qenë një yll i ardhshëm i futbollit gjerman. Ai shprehu këto mendime në një intervistë për Sky Sport, ku theksoi se i riu ka gjithçka të nevojshme për t’u bërë një lojtar i shkëlqyer. “Ai ka çdo mundësi për t’u bërë një emër i madh në futbollin gjerman,” tha Matthaus. Sipas tij, mjedisi që ofron FC Bayern është ideal për zhvillimin e të riut, duke e vendosur atë në një skuadër funksionale.
Matthaus theksoi se Karl ka treguar performanca të rëndësishme në lojë, duke u dalluar për driblimin e tij dhe për besimin në vetvete, edhe gjatë intervistave. Atij i duket se është koha për të dhënë një mundësi Karl në skuadrën përfaqësuese të seniorëve. “Ai është një kandidat shumë i rëndësishëm, sepse lojtarët si ai, të cilët kanë diçka të veçantë, kërkohen në turne të tillë,” theksoi ai.
Ish-mesfushori dhe kapiteni i njohur theksoi rëndësinë e lojtarëve që janë të aftë të shprehin kreativitetin e tyre, në vend që të kufizohen në skema të paracaktuara. “Këta lojtarë të rrugës, të cilët nuk pranojnë të detyrohen në një sistem, por ndihmojnë ekipin me ndjenja dhe instikte, janë të kërkuar në garat si kjo… dhe kjo është pikërisht ajo që paraqet Lennart Karl,” përfundoi Matthaus.
Kjo mbështetje për Karl nga një figurë legjendare si Matthaus mund të jetë një trampolinë për karrierën e tij, duke e vendosur atë në qendër të vëmendjes për trajnerin Nagelsmann dhe mundësinë e përfshirjes në përfaqësuesen gjermane. Në një kohë kur futbolli gjerman po kërkon të rikthehet në nivelet më të larta, njohja e talenteve të reja është më e rëndësishme se kurrë.
