Shqipëria vijon të përballet me pasojat e motit të keq, ndërsa në fshatin Viron të Sarandës po evidentohen dëme masive në blegtori pas përmbytjeve të ditëve të fundit. Edhe pse sot situata është drejt normalizimit dhe uji është tërhequr ndjeshëm, fermerët po përballen me humbje të konsiderueshme.
Në fermën e Lulzim Osmanit, lumi Bistricë që doli nga shtrati ka përmbytur plotësisht stallën, duke shkaktuar ngordhjen e një numri të madh bagëtish. Dëmet përfshijnë rreth 30 qingja, 13 dele, 120 dhi dhe 60 keca, nga të cilat një pjesë nuk u gjetën, ndërsa pjesa tjetër nuk arriti të dalë nga stalla për shkak të rritjes së papritur të nivelit të ujit.
Përveç humbjes së krerëve, uji ka shkatërruar edhe rezervat ushqimore të fermës, duke e lënë familjen pa burime për mbajtjen e bagëtive të mbetura. Fermeri ka kërkuar ndërhyrjen e autoriteteve për largimin e kafshëve të ngordhura dhe ofrimin e ndihmës së menjëhershme me ushqim, pasi ferma mbetet e vetmja burim të ardhurash për familjen Osmani.
“Kanë ngordhur 30 qingja, 13 krerë dele, 120 dhi dhe 60 keca. Dhitë dhe kecat nuk i kemi gjetur fare, ndërsa pjesa tjetër e bagëtive nuk kanë mundur të dalin nga stalla. Dëmet i konstatuam vetëm pasi ra niveli i ujit në stallë. Kemi kontaktuar autoritetet dhe presim të hiqen kafshët e ngordhura. Bëj apel të na ndihmojnë edhe me ushqim për ato pak kafshë që na kanë mbetur,” tha ai në një prononcim për mediat.
