Një analizë e re ka zbuluar se çrregullimet e të ngrënit rrisin rrezikun për probleme serioze shëndetësore, madje edhe shumë vite pas diagnozës.
Sipas një studimi të publikuar në BMJ Medicine, personat me këto çrregullime rezultojnë më të ekspozuar ndaj sëmundjeve të mëlçisë, diabetit, osteoporozës dhe depresionit brenda vitit të parë pas diagnostikimit. Rreziqet mbeten të larta edhe deri një dekadë më vonë.
Studiues nga Britania e Madhe analizuan të dhënat e rreth 24,700 personave në Angli me diagnozë të çrregullimeve të të ngrënit dhe i krahasuan ato me rreth 493,000 individë të ngjashëm pa këto probleme.
Nga pjesëmarrësit, 89% ishin gra dhe vajza; 15% kishin anoreksi, 21% bulimi, dhe 5% çrregullim të ngrënies së tepruar.
Brenda vitit të parë, të diagnostikuarit kishin rrezik dukshëm më të lartë për sëmundje të mëlçisë, dështim renal, osteoporozë, diabet, insuficiencë kardiake, depresion, vetë-dëmtime dhe tentativë vetëvrasjeje.
Edhe pas pesë dhe dhjetë vitesh, ndonëse rreziku ulet, ai mbetet i konsiderueshëm.
Studimi thekson nevojën për monitorim afatgjatë të pacientëve me histori çrregullimesh të të ngrënit.
Megjithatë, autorët theksuan kufizime, përfshirë faktin se nuk ishte e qartë sa të rënda ishin çrregullimet dhe se shumë pacientë kishin sfida shëndetësore – sidomos mentale – edhe përpara diagnozës.
Studiuesit u bënë thirrje mjekëve të përgjithshëm të ofrojnë mbështetje më të gjerë dhe të koordinojnë kujdesin me specialistët, duke theksuar se ekziston një boshllëk në trajtimin e pacientëve me probleme komplekse.
Ata theksuan rëndësinë e ndihmës së vazhdueshme për rikuperim. Në rast krize, rekomandohet të kontaktoni organizata si Befrienders Worldwide.
