Vetëm shtatë muaj para nisjes së Botërorit, presidenti amerikan Donald J. Trump ka ndezur polemika të forta, duke kërcënuar se do të heqë nga turneu të gjitha qytetet pritëse që drejtohen nga Demokratët. Një presion i drejtpërdrejtë mbi FIFA-n, e cila gjendet në një udhëkryq të rrezikshëm.
Gjatë mbledhjes së fundit të Task-Forcës së Kupës së Botës 2026, të zhvilluar si zakonisht në Shtëpinë e Bardhë me pjesëmarrjen e Trump dhe presidentit të FIFA-s, Gianni Infantino, u krijua përshtypja se disa prej qyteteve të konfirmuara si mikpritëse janë ende në rrezik. Veçanërisht ato të drejtuara nga zyrtarë demokratë, të cilat Trump i ka vendosur në shënjestër.
Gjatë takimit, kur u përmend kryetarja e re socialiste e Seattle, Katie Wilson, Trump u përgjigj:
“Nëse shohim që mund të ketë problem, do t’i kërkoja Gianni-t ta zhvendosë ndeshjen në një qytet tjetër.”
Ai vazhdoi me tone të ashpra:
“Nëse shohim probleme në Seattle, ku kanë një kryetare shumë liberale/komuniste… do t’i themi Gianni-t: ‘Mund ta zhvendosim?’ Nuk besoj se do të kemi probleme. Por do ta çojmë garën diku ku do të pritet mirë dhe do të jetë e sigurt.”
Infantino, i vendosur mes presionit politik dhe përgjegjësisë sportive, u përgjigj shkurt:
“Siguria është prioriteti numër një për suksesin e një Botërori.”
Një deklaratë që vetëm shton dyshimet mbi të ardhmen e qyteteve pritëse nën drejtim demokrat.
Çështja nuk është mbyllur.
Rreth një muaj më parë, presidenti i CONCACAF-it dhe zv.president i FIFA-s, Victor Montagliani, foli prerazi në një event në Londër:
“Ky është turne i FIFA-s dhe FIFA i merr vendimet. Me gjithë respektin për liderët aktualë botërorë, futbolli është më i madh se ata dhe do të jetojë më gjatë se qeveritë, regjimet dhe sloganet e tyre.”
Megjithatë, qëndrimi i Infantino-s—partner strategjik e komercial i Trump—mbetet i paqartë. FIFA gjendet në një situatë delikate, ndërsa më 5 dhjetor në Washington do të mbahet shorti i Kupës së Botës, ku pritet të marrë pjesë edhe presidenti amerikan.
