Ministria e Punëve të Jashtme e Malit të Zi ka reaguar me forcë ndaj deklaratave të ambasadorit rus, Aleksandar Lukashiç, duke i konsideruar veprimet e tij si të papranueshme dhe si ndërhyrje në punët e brendshme të vendit. Ambasadori u thirr në Ministri për të sqaruar kritikat e tij ndaj institucioneve malazeze, përfshirë komentet negative lidhur me vendimin e Kuvendit për bashkimin e Ushtrisë së Malit të Zi me mekanizmin NATO për ndihmën ndaj Ukrainës (NSATU).
Lukashiç kishte akuzuar qeverinë malazeze për “demonizimin e Rusisë” dhe për forcimin e perceptimit të Malit të Zi si një shtet armik ndaj Moskës. Një nga komentet e tij e përfshinte në kontekstin e një interviste të presidentit Jakov Millatoviç, ku ky i fundit theksonte se anëtarësimi i Malit të Zi në Bashkimin Evropian përbënte strategjinë më të mirë për t’u mbrojtur nga ndikimi rus. Ambasadori kritikoi gjithashtu politikën e NATO-s, duke e quajtur atë një “luftë hibride” ndaj Moskës.
Në reagimin e saj zyrtar, Ministria i bëri të ditur Lukashiçit se përbuzia ndaj institucioneve malazeze nuk do të tolerohet dhe që do të merret një qëndrim adekuat ndaj veprimeve të tillë, përfshirë mundësinë e trajtimit të ngjashmëve si aktivitete armiqësore. Ministria theksoi gjithashtu se Mali i Zi vepron sipas interesave të tij kombëtare dhe se nuk është nën ndikimin e palëve të tjera.
Kuvendi i Malit të Zi miratoi më 12 nëntor pjesëmarrjen në NSATU, vendim ky që do të çonte dy ushtarë malazezë në trajnim në Gjermani për ndihmën e Ukrainës. Ky vendim u miratua nga 44 deputetë, ndërsa disa nga partitë opozitare, përfshirë ato të lidhura me Rusinë, shfaqën kundërshtime. Siç është theksuar, përfshirja e Malit të Zi në këto aktivitete është në përputhje me prioritetet e tij të politikës së jashtme për integrimin në NATO dhe BE.
