Mbrojtësi i Real Madridit, Dean Huijsen, do të humbasë ndeshjen e Spanjës ndaj Gjeorgjisë në kuadër të kualifikimeve për Kupën e Botës 2026.
Sipas “The Athletic”, 20-vjeçari ndjeu shqetësime në ijë gjatë seancës stërvitore të së premtes dhe u la jashtë skuadrës për arsye paraprake. Ditët në vijim ai do t’i nënshtrohet kontrolleve mjekësore për të përcaktuar kohën e rikuperimit.
Huijsen ishte titullar në dy ndeshjet e Spanjës në shtator, duke dhënë kontribut të rëndësishëm në fitoret ndaj Bullgarisë dhe Turqisë. Megjithatë, në tetor ai pësoi një tjetër dëmtim, që e mbajti jashtë sfidave kundër Gjeorgjisë dhe Bullgarisë, si dhe disa ndeshjeve me Real Madridin.
Këtë sezon, mbrojtësi ka zhvilluar 13 paraqitje me madrilenët, pas transferimit të tij veror nga Bournemouth për rreth 50 milionë paund.
Spanja luan sot ndaj Gjeorgjisë në kuadër të kualifikueseve, me fillim në orën 18:00 sipas kohës së Evropës Qendrore.
