Familja Maldini, një dinasti e futbollit italian, vazhdon të shkruajë historinë e saj legjendare. Pas Çezares dhe Paolos, tani është radha e Danieles, djali i Paolos dhe nipi i Çezares, të përfaqësojë Italinë. Me paraqitjet e tij mbresëlënëse me Monzën, Daniele Maldini ka tërhequr vëmendjen e trajnerit të kombëtares, Luçiano Spaleti, i cili ka vendosur ta grumbullojë për ndeshjet e tetorit.
Historia e Maldinëve është e lidhur ngushtë me skuadrën e Milanit. Cesare Maldini, si lojtar dhe më vonë si trajner, dha një kontribut të jashtëzakonshëm në sukseset e klubit. Djali i tij, Paolo Maldini, është një ikonë e Milanit, duke fituar gjithçka me skuadrën, përfshirë 5 tituj të Ligës së Kampionëve. Paolo është gjithashtu një nga mbrojtësit më të mirë të të gjitha kohërave dhe ka shërbyer si kapiten i kombëtares italiane. Tani, brezi i tretë i Maldinëve po bën hapat e tij në futbollin ndërkombëtar me Danielen.
Trajneri Spaleti ka folur me shumë vlerësime për talentin e ri, duke konfirmuar se grumbullimi i tij me kombëtaren e madhe vjen si rezultat i paraqitjeve të shkëlqyera. Spaleti gjithashtu theksoi se prania e të rinjve si Daniele është shumë e rëndësishme për të përmirësuar ekipin pas një performance jo të suksesshme në Europianin e fundit.
“Pisili dhe Maldini janë në listën e madhe. Kemi përfshirë këta të rinj, dhe jemi të kënaqur që mund të japin një kontribut të madh për të rregulluar gjërat,” u shpreh Spaleti.
