Presidenti në largim i Shteteve të Bashkuara të Amerikës, Joe Biden, ka tërhequr sërish vëmendjen e mediave, këtë herë për një moment të pazakontë gjatë një takimi me liderët afrikanë në Angola. Gjatë fjalimit të zëvendës presidentit të Tanzanisë në këtë takim, Biden është kapur duke mbyllur sytë dhe duke fjetur për disa momente, një pamje që u vërejt nga të pranishmit.
Ky moment është interpretuar nga disa si një shenjë lodhjeje, ndoshta për shkak të angazhimeve të shumta ndërkombëtare dhe ngarkesës që ka pasur gjatë këtyre ditëve. Biden ndodhej në një vizitë tre ditore në Angola, vizita e parë dypalëshe e tij në Afrikë që nga marrja e detyrës si president në vitin 2021.
Ky incident ka shkaktuar një valë komentesh në mediat ndërkombëtare, ndërkohë që disa ekspertë e kanë lidhur këtë moment me moshën e tij dhe ritmin e intensifikuar të udhëtimeve diplomatike.
