Stamboll, 7 nëntor 2025 — Një gjykatë në Stamboll ka lëshuar urdhra arresti për 37 persona, përfshirë kryeministrin izraelit Benjamin Netanyahu, me akuza për “krime kundër njerëzimit” dhe “gjenocid” në Rripin e Gazës, si dhe për sulmin ndaj anijes humanitare “Global Sumud Flotilla”, e cila u ndalua nga marina izraelite në tetor.
Sipas Agjensisë së lajmeve Anadol që i referohet zyrës së Prokurorit të Përgjithshëm të Stambollit, urdhrat u lëshuan pas hetimeve që dokumentuan “gjenocidin sistematik dhe krimet ndaj njerëzimit të kryera nga shteti i Izraelit në Gaza”, ku mijëra persona — mes tyre gra e fëmijë janë vrarë, plagosur ose zhvendosur, ndërsa zona të tëra banimi janë bërë të pabanueshme.
Në deklaratë përmendet edhe vrasja e vajzës gjashtëvjeçare Hind Rajab më 29 janar 2024, e qëlluar me 335 plumba nga forcat izraelite, si dhe sulmet ndaj spitalit Al-Ahli më 17 tetor 2023, ku humbën jetën rreth 500 civilë. Po ashtu, më 21 mars 2025, u bombardua Spitali i Miqësisë Turko-Palestineze, ndërsa dhjetëra qendra të tjera shëndetësore u shkatërruan.
Prokuroria turke njoftoi se pasagjerët e “Global Sumud Flotilla”-s, të cilët po udhëtonin me ndihma humanitare për në Gaza, u ndaluan nga marina izraelite në ujëra ndërkombëtare dhe më pas u dërguan në Turqi për ekzaminime mjeko-ligjore.
Bazuar në provat e mbledhura, u konstatua se zyrtarë të shtetit të Izraelit mbajnë përgjegjësi penale për veprimet sistematike të gjenocidit dhe krimeve kundër njerëzimit.
Në mesin e 37 personave për të cilët u lëshuan urdhra arresti janë edhe ministri i mbrojtjes Yisrael Katz, ministri i sigurisë kombëtare Itamar Ben-Gvir, shefi i shtabit Eyal Zamir dhe komandanti i marinës David Saar Salama.
Urdhrat e arrestit janë lëshuar në bazë të neneve 76 dhe 77 të Kodit Penal të Turqisë. Prokuroria bëri të ditur se hetimet po zhvillohen me kujdes dhe në mënyrë gjithëpërfshirëse.
