Një analizë e re ka zbuluar se normat e infeksioneve në gjak të shkaktuara nga bakteret rezistente ndaj antibiotikëve pritet të rriten në mënyrë të konsiderueshme në mbarë Evropën, për shkak të plakjes së popullsisë në vitet në vijim. Rezistenca ndaj antimikrobikëve (AMR) ndodh kur bakteret zhvillohen deri në një pikë ku antibiotikët nuk janë më efektivë. Këto “superbaktere” shkaktojnë rreth një milion vdekje çdo vit në nivel global.
Studimi, i publikuar në revistën PLOS Medicine, parashikon një rritje të vazhdueshme të infeksioneve rezistente deri në vitin 2030, me variacione në përputhje me vendin, gjininë, grupmoshën dhe kombinimet e bakterit-antibiotik. Rritjet e parashikuara variojnë nga 22.2% (infeksionet e Streptococcus pneumoniae te gratë) deri në 61.5% (infeksionet e Klebsiella pneumoniae te burrat). Gjithashtu, pritet që normat e infeksionit të rriten më shumë te burrat sesa te gratë për gjashtë nga tetë bakteret e studiuara, si dhe të rriten në mënyrë më drastike te të rriturit mbi 74 vjeç në krahasim me grupmoshat më të reja.
Infeksionet në gjak mund të jenë vdekjeprurëse, duke shkaktuar komplikacione si septicemia. Gwenan Knight, autore e lartë e studimit dhe bashkëdrejtuese e Qendrës për Rezistencën Antimikrobike, theksoi se ngarkesa e ardhshme nga infeksionet rezistente nuk do të jetë uniforme dhe se mosha e gjinia shpesh nuk konsideroheshin në projektimet e AMR, megjithatë ato ndikojnë realisht në ata që preken më së shumti.
Ekipa e Knight-it analizoi të dhënat nga më shumë se 12.8 milion teste të zakonshme të gjakut për infeksione bakteriale në 29 vende evropiane midis 2010 dhe 2019. Njohja e grupeve më në rrezik do të ndihmojë shkencëtarët dhe politikëbërësit për të zhvilluar plane më të targetuara, për të reduktuar numrin e vdekjeve dhe problemeve shëndetësore të lidhura me infeksionet rezistente.
Megjithatë, arritja e objektivave të mëdha duket e vështirë. Pavarësisht se zyrtarët globalë të shëndetit kanë vendosur një objektiv për zvogëlimin e rezistencës ndaj antibiotikëve me 10% deri në vitin 2030, parashikimet tregojnë se kjo është e mundur vetëm për rreth dy të tretat e kombinimeve bakter-antibiotik. Knight nënvizoi se “të parandalosh rritjen e mëtejshme të infeksioneve rezistente do të ishte një arritje e madhe për shëndetin publik”.
