Presidentja meksikane Claudia Sheinbaum është bërë viktimë e një sulmi seksual nga një burrë teksa po komunikonte me qytetarët në një rrugë historike të Mexico City. Incidenti, i cili u filmua dhe u publikua nga Daily Mail, tregon burrin që, dukshëm në gjendje të dehur, përpiqet ta puth presidenten pa pëlqimin e saj dhe i vendos duart në gjoks. Sheinbaum, e cila reagoi me qetësi, i tha burrit të mos shqetësohet dhe se do ta bëjnë një foto, përpara se një anëtar i ekipit të sigurisë të ndërhyjë.
Reagimet në rrjetet sociale ishin të shumta dhe të ashpra, me përdorues që e vënë në dyshim reagimin e sigurisë presidenciale. Një përdorues në platformën X (ish-Twitter) shkroi: “Ku ishte sigurimi i saj?” Ndërsa një tjetër theksoi se nëse Meksika nuk mund të mbrojë presidenten, si mund të mbrojë qytetarët e zakonshëm. Më tej, shumë komentues e quajtën të pabesueshëm reagimin e truprojave të prezidentes.
Sipas mediave lokale, burri u arrestua menjëherë pas incidentit, por zyra e Presidentes nuk ka ofruar një deklaratë zyrtare deri tani. Në reagimet zyrtare, Sekretariati për Gratë, Institutet e Grave në Entet Federale dhe Komitetet për Barazi Gjinore kanë dënuar ashpër sulmin, duke shprehur shqetësim për faktin se asnjë grua nuk është e përjashtuar nga ngacmimet seksuale në vendin e tyre. Ata theksuan se punojnë çdo ditë për të luftuar këtë fenomen.
Meksika vazhdon të përballet me një nivel të lartë dhune ndaj grave, ku ngacmimet në rrugë janë vetëm një pjesë e problemit. Aktivistët lidhin këtë fenomen me kulturën e “mashkullorisë” që mbizotëron në vend, duke theksuar se situata është alarmante dhe kërkon një vëmendje të menjëhershme dhe masa mbrojtëse.
