Cristiano Ronaldo ka ndarë për herë të parë detaje nga momenti kur i propozoi për martesë partneres së tij, Georgina Rodriguez.
Në një intervistë për emisionin “Piers Morgan Uncensored”, ylli portugez i Al-Nassr-it tha me humor se “nuk është një person romantik”, por se situata e çoi drejt një propozimi të papritur dhe të paharrueshëm.
Ronaldo rrëfeu se gjithçka ndodhi rreth orës 1 të natës, kur vajzat e tyre ishin në gjumë. Ai tregoi se një mik i tij i dha unazën për t’ia ofruar Georginës, por në momentin e propozimit, fëmijët hynë papritur në dhomë dhe e pyetën:
“Baba, do i japësh unazën mamit dhe do i kërkosh të martohet?”
Kjo ndërhyrje, sipas Ronaldos, e bëri momentin edhe më të bukur. Ai shtoi se nuk e kishte planifikuar ta bënte atë natë, por situata e ndjeshme dhe reagimi i fëmijëve e shtynë të vepronte menjëherë.
Miqtë e tij që ndodheshin aty e filmuan skenën, duke e kthyer propozimin në një kujtim të veçantë familjar. “Nuk u ula në gjunjë sepse nuk isha përgatitur, por ishte një moment i sinqertë dhe shumë i bukur,” – tha Ronaldo.
Ai shtoi me sinqeritet se nuk është tip romantik:
“Jam romantik në mënyrën time, por nuk jam nga ata që sjell lule çdo javë në shtëpi.”
Ronaldo theksoi se Georgina është “gruaja e jetës së tij” dhe se ky propozim, megjithëse i thjeshtë, kishte një domethënie të madhe për të dhe për familjen e tij. Ai e përshkroi ngjarjen si një nga momentet më të bukura dhe të paharrueshme të jetës së tij personale.
