Katër viktima dhe shtatë të plagosur. Ky është bilanci tragjik i aksidenteve rrugore që ndodhën në këtë të mërkurë, një ditë që ka lënë katër familje në dhimbje të thellë.
IliriaNews ka bërë një përmbledhje të ngjarjeve të rëndësishme që ndodhën brenda një periudhe të shkurtër kohe.
Buran Gjoka dhe Destan Gjeta janë dy nga viktimat e aksidentit fatal në Qafën e Buallit, ndërsa një person tjetër, me inicialet A.Gj., ka mbetur i plagosur. Të tre ata po ktheheshin nga miniera kur ndodhi tragjedia.
Në Luzni të Dibrës, një aksident i tmerrshëm i mori jetën Arta Çerës, e cila u përplas me makinë nga bashkëshorti i saj në oborrin e shtëpisë. Sipas hetimeve, ngjarja ka qenë aksidentale, ndërsa Hajri Çera është arrestuar dhe ndodhet në komisariat.
Një tjetër tragjedi u shënua në Qerekë të Krujës, ku një vajzë 4-vjeçare humbi jetën pas një aksidenti tragjik, kur babai i saj aksidentalisht e shtypi në oborrin e një biznesi.
Në Korçë, një çift bashkëshortësh u plagosën rëndë pasi automjeti i tyre u përmbys në rrugë, ndërsa një tjetër aksident ndodhi pranë stadiumit të Elbasanit, ku dy persona mbetën të plagosur.
Policia Rrugore ka dhënë informacionet e para për këto aksidente dhe ka njoftuar se grupet hetimore janë duke punuar për zbardhjen e rrethanave të ngjarjeve.
