Ish-kopshtari i Kompleksit “Golden”, Festim Bexhdilli i cili akuzohet si i përfshirë në rrëmbimin dhe vrasjen e Jan Prengës është “rrëfyer” para grupit hetimor.
Bexhdilli është rikthyer pas në ditën kur dhe ndodhi ngjarja, duke përshkruar me detaje momentin kur një “Range Rover” ngjyrë i bardhë mbërriti te kompleksi “Golden” ku dhe ai punonte.
Sipas tij, menjëherë automjeti u fut në garazh nga ku dolën katër persona të armatosur, fytyrat e të cilëve nuk i kujton, por mban mend dialektin e tyre i cili sipas tij ishte verior.
“Isha duke pastruar pishinën, kur erdhi një Range Rover i bardhë dhe u fut tek garazhi. Shkova t’i pyesja. Ishin 4 veta të armatosur. Nuk i njihja. Më kërkuan ujë dhe ju dërgova. Isha i frikësuar. Më thanë “ka vdekur njëri”.
Më thanë ta kalojmë nga makina në makinë. Isha shumë i trembur, nga armët e tyre edhe se pashë një të vdekur. E kaluam nga Range në një Fiat Doblo, që e përdornim për furnizimet në kompleks. E zhvendosëm trupin.
Fytyrat i kishin zbuluar, por nuk i kujtoj. Njëri kishte tatuazhe. Pastaj më kërkuan edhe një kazmë e një lopatë. Nga gjuha mu dukën si nga veriu”, mësohet të ketë thënë Bexhdilli para grupit hetimor.
Më tej dëshminë e tij e ka vijuar duke bërë me dije se më pas atyre iu bashkua dhe pronari i tij, Altin Hajri i cili iu drejtua katër personave me një ton të ashpër dhe duke iu kërkuar që të largohen.
“Aty erdhi pastaj Altin Hajri. Ai i shau dhe ju tha “c’doni këtu, po na merrni në qafë”. Ju kërkoi të ikin shpejt. Nuk e di c’bëri Altini pastaj. Nuk e di për çfarë i deshën kazmën e lopatën. Jua dhashë dhe ata i futën ne makinë. Pasi ata ikën unë shkova në shtëpi në Kavajë”, ka thënë ndër të tjera ish-kopshtari.
Bexhdili edhe në dëshmitë e dhëna më herët i ka mëshuar faktit se nuk ka lidhje me këtë ngjarje. Ashtu sikurse kemi raportuar dhe më herët, Bexhdili para prokurorëve është shfaqur i tensionuar, ndërsa ka deklaruar se është i pafajshëm dhe se është futur në hasmëri me persona kot.
Rrëmbimi dhe vrasja e Jan Prengës
Kujtojmë që Jan Prenga u rrëmbye më 17 janar të 2020 pranë banesës së tij në rrugën “London” në Kamëz.
Jan Prenga u rrëmbye në Kamëz, dyshohet pas një konflikti që vëllai i tij kishte me trafikantët shqiptarë të kokainës, pasi u akuzua se kishte përvetësuar një ngarkesë prej 260 kilogram kokainë në Britaninë e Madhe.
Ai dyshohet se është vrarë në kompleksin luksoz “Golden” i cili ështën ë pronësi të dy vëllezërve Altin dhe Emiliano Hajri.
Trupi i Prengës ende nuk është gjetur po ka dyshime të forta se ai u rrëmbye edhe u vra për shkak të dhunës barbare të ushtruar ndaj tij, duke i “mbetur” në dorë rrëmbyesve që u porositën nga Altin Hajri.
Motiv i krimit dyshohet të jetë një ngarkesë kokaine prej 260 kg, ku ishte i përfshirë vëllai i të ndjerit.
Kjo çështje u kthye sërish në vëmendje pas arrestimit të ish-deputet socialist Jurgis Çyrbja.
Nga hetimet e deritanishme dhe “zbërthimi” i aplikacionit “SKY ECC” rezulton se ish-deputeti socialist përmes kunatit të vëllait të tij, Ahmet Mashës ka dekonspiruar operacionet e Policisë së Durrësit për arrestimin e personave të shpallur në kërkim.
Ish-deputeti ka ndihmuar pronarin e kompleksit “Golden”, Altin Hajri, që t’i shpëtojë bluve dhe në këmbim ai e ka ndihmuar që të siguronte mandatin e deputetit në zgjedhjet e 2021.
Kush është Altin Hajri?
Altin Hajri, i cili ishte në kërkim për katër vite për zhdukjen e Jan Prengës, është një biznesmen i njohur dhe i lidhur me botën e krimit. Ai dyshohet se ka ndërhyrë në vitin 2017 që Jurgis Çyrbja të përfshihej në listat e sigurta të Partisë Socialiste për deputet. Sipas hetimeve, Çyrbja ka ndihmuar Hajrin të arratisej dhe të fshihej nga autoritetet.
Në vitin 2020, bisedat e përgjuara në platformën e koduar SKY zbuluan se Çyrbja dhe Hajri dyshohet ishin në komunikim të vazhdueshëm për çështje kriminale. Hajri, i akuzuar për përfshirje në rrëmbimin dhe zhdukjen e Jan Prengës, ka qenë një nga emrat më të kërkuar nga drejtësia shqiptare.
