Aktiviteti ekonomik në internet tashmë është zyrtarisht pjesë e sistemit tatimor. Me ndryshimet e reja ligjore të miratuara në kuadër të paketës fiskale dhe të publikuara në Fletoren Zyrtare, çdo individ që fiton të ardhura online, përfshirë influencerët dhe blogerët, do të trajtohet si subjekt tregtar.
Sipas ligjit, këta individë janë të detyruar të publikojnë në profilin ose faqen e tyre në rrjetet sociale të dhëna bazë si NIPT-in, emrin e subjektit, adresën dhe kontaktin.
Administrata tatimore do të kontrollojë aktivitetin ekonomik online duke u bazuar te të ardhurat e depozituara në llogaritë bankare dhe do të njoftojë zyrtarisht ata që nuk janë të formalizuar.
Në rast se brenda 15 ditëve nga njoftimi nuk merren masa për publikimin e të dhënave dhe regjistrimin e aktivitetit, ligji parashikon masa ndëshkuese, përfshirë gjoba dhe bllokimin e llogarive në rrjetet sociale.
Kontrollet e kryera nga tatimet kanë zbuluar se vetëm gjatë vitit 2025 rreth 100 profile në rrjete sociale kanë gjeneruar mbi 33 milionë euro të ardhura, të depozituara në llogari bankare individuale. Autoritetet synojnë që me këto ndryshime të frenojnë informalitetin dhe të fusin ekonominë online në skemën e rregullt tatimore.
