Shqiptarët janë më të prekurit në rajon nga pasiguria ushqimore, sipas raportit më të fundit të titulluar “Gjendja e Sigurisë Ushqimore dhe Ushqyerjes në Botë”, të hartuar nga pesë agjenci të specializuara të Kombeve të Bashkuara.
Sipas të dhënave, 33% e popullsisë në Shqipëri jeton me frikën se nuk do të ketë ushqim të mjaftueshëm një përqindje ndjeshëm më e lartë se në vendet e tjera të Ballkanit, ku pasiguria varion nga 6.6% deri në 15%.
Shqipëria qëndron gjithashtu mbi mesataren globale, e cila është 28%, duke e vendosur vendin ndër më të prekurit nga mungesa e aksesit të qëndrueshëm në ushqim.
Ekspertët që hartuan raportin theksojnë se pasiguria ushqimore ka shënuar një rënie të lehtë në rang global. Megjithatë, në vitin 2024, rreth 673 milionë njerëz ose 8.2% e popullsisë botërore kanë përjetuar uri, një shifër që, ndonëse më e ulët se në vitin 2023, mbetet ende mbi nivelet para pandemisë.
Sipas raportit, inflacioni i lartë i ushqimeve në vitet e fundit ka ngadalësuar rimëkëmbjen globale, duke mbajtur sfidat e sigurisë ushqimore në rend të ditës.
