Një ngjarje e rëndë është regjistruar në Mal të Zi pasditen e kësaj të mërkure, ku fatkeqësisht shtatë persona kanë humbur jetën. Sipas mediave vendase mësohet se ngjarja e rëndë ka ndodhur në një lokal në qytetin e Cetinjës, ku disa persona u konfliktuan me njëri-tjetrin, debat i cili agravoi deri në përdorimin e armëve të zjarrit.
Si pasojë e të shtënave fatkeqësisht humbën jetën shtatë persona, mes tyre dy fëmijë, ndërsa katër të tjerë mbetën të plagosur dhe janë duke marrë ndihmën mjekësore në spital.
Deri më tani mësohet se autori i kësaj masakre është Aco Martinoviq, i cili është shpallur në kërkim nga policia. Ky shtetas, thuhet se ka hapur zjarr pas një konflikti në ambientet e lokalit.
Policia ka apeluar qytetarët e Cetinjës që të qëndrojnë të sigurt brenda banesave të tyre, ndërsa theksoi se ngjarja nuk lidhet me përplasje të grupeve të organizuara kriminale, por është një incident i izoluar.
Hetimet për zbardhjen e plotë të kësaj ngjarje po vazhdojnë, ndërkohë autoritetet janë “ngritur në këmbë” me qëllim lokalizimin dhe arrestimin e këtij shtetasi i cili shkaktoi këtë tragjedi në ditën e parë të vitit 2025.
