Më 8 janar 2026, Komandanti i Brigadës së Zjarrfikësve në Mitrovicë të Jugut, Burim Ibishi, njoftoi se nga ora 2 e mëngjesit deri në momentin e raportimit janë evakuuar 15 familje nga lagjja “2 Korriku”, për shkak të përmbytjeve që kanë përfshirë zonën.
Situata është alarmante, pasi uji ka mbuluar gati tërë lagjen, duke shkaktuar shqetësime të mëdha për banorët.
Ibishi tha se ekipet e emergjencës po përballen me vështirësi, pasi disa banorë refuzojnë të evakuohen. Ai theksoi se disa dalin për t’u larguar nga ambientet e rrezikuara, ndërsa të tjerë nuk pranojnë të largohen, gjë që komplikon operacionet dhe kërkon organizim të kujdesshëm.
Megjithatë, komandanti sqaroi se situata nuk është jashtëzakonisht alarmante, pasi ujërat nuk kanë dalë jashtë shtretërve të tyre përveç disa pjesëve më problematike si “2 Korriku” dhe “Lisica”.
Zjarrfikësit janë në gatishmëri të përhershme për të ndihmuar banorët dhe për të siguruar evakuimin e tyre në mënyrë të sigurt.
Ibishi bëri thirrje për bashkëpunim nga qytetarët, duke i inkurajuar ata që ndodhen në rrezik të pranojnë ndihmën dhe të evakuohen sa më shpejt.
