Ish-kryeministri Sali Berisha ka folur sot për 21 Janarin. 14 vite pas vrasjes së 4 protestuesve, Berisha tha se ka kërkuar hetim ndërkombëtar. Sipas tij zbardhjen e pengon Edi Rama, që ishte organizator i demonstratës.
“Së pari keqardhjen time e kam shprehur për viktimat jo pas 14 vitesh sikur pretendoni ju apo ata që mendojnë si ju, por e kam shprehur fiks në ora 7 të darkës të asaj nate, në 21 Janar të vitit 2011. Dhe në mënyrë të përsëritur. Së dyti, po atë natë kam kërkuar një hetim ndërkombëtar, kam kërkuar jo hetim, por hetim ndërkombëtar të cështjes. Institucionet më serioze ndërkombëtare se ajo protestë e dhunshme kishte axhendë politike. Së treti, edhe njëherë ka një deklaratë të qeverisë së SHBA-së, në të cilën kërkohet hetimi që nga polici tek organizatori që publikisht dhe botërisht është Edi Rama.
Së katërti ata që nuk duan të mashtrojnë veten dhe të përdorin fatkeqësitë e të tjerëve për ushqim politik duhet ta dinë se në këto 14 vite, prokuroria ka qenë tërësisht në kontrollin e Edi Ramës. Ishte Ina Rama që unë e akuzova si puçistë që refuzoi prokurorin ndërkombëtar dhe pas Ina Ramës, nga Ina Rama te Olsi Çela, njeri tjetër përveç Edi Ramës nuk i ka penguar që të hetojnë cdo aspekt.
U sollën për qëllime të mirëfillta politike, për të pushtuar kryeministrinë, se Rama donte sipas shumë gjasave të mbante edhe një fjalim, është dëshmi e keqpërdorimit total të kësaj ngjarje, kryekëput për të fshehur përgjegjësinë e organizatorëve që sollën njerëz. Mbështes cdo lloj hetimi të kësaj ngjarje por deklaroj se nuk ka asnjë tjetër vetëm për të shpëtuar përgjegjësitë e atij që organizoi protestën më të dhunshme, Edi Ramës” tha ai.
