Puna për identifikimin, gjurmimin dhe sekuestrimin e pasurive të dyshuara si rezultat i aktiviteteve kriminale vazhdon me intensitet nga specialistët e Hetimit të Krimit Ekonomik dhe Financiar në DVP Vlorë.
Së fundmi, është raportuar se janë sekuestruar pasuri me vlerë rreth 12 milion euro, të cilat dyshohet se janë fituar nga të ardhura të paligjshme.
Në kuadër të këtyre hetimeve, janë identifikuar dy raste konkrete dhe, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, janë ngritur procedime penale.
Një nga të arrestuarit, K. Q. (alias J. H.), 43 vjeç, me histori kriminale në fushën e narkotikëve, dyshohet për “Pastrimin e produktet e veprës penale”.
Gjykata e Sarandës ka vendosur sekuestro preventive mbi pasuritë e tij, përfshirë një hotel gjashtëkatësh dhe një hotel katërkatësh në Sarandë.
Pjesë e hetimeve është edhe A. K., 53 vjeç, i cili ka precedentë në krime ndaj personit, trafik dhe narkotikë.
Gjykata e Sarandës ka vendosur sekuestro mbi pasuritë e tij, duke përfshirë lokale shërbimi në Sarandë, një apartament dhe pasuri të tjera në Tiranë, si dhe një sërë pronash në Rradhimë dhe Memaliaj.
Gjithashtu, janë sekuestruar objekte të tjera si mjete lundrues dhe automjete, së bashku me llogari bankare. Puna vijon për të identifikuar dhe sekuestruar pasuritë që mund të jenë regjistruar në emër të personave të tjerë, përfshirë familjarët e të dyshuarve.
Ky aksion është pjesë e një përpjekjeje më të gjerë për të luftuar krimin ekonomik dhe financiar në Shqipëri dhe për të trajtuar pasuritë e paligjshme që dëmtuan sistemin e shtetit.
Prokuroria dhe DVP Vlorë kanë intensifikuar punën për të garantuar që pasuritë e fituara në mënyrë kriminale të mos mbeten jashtë duarve të ligjit.
